يا ناس دلوني

يا ناس دلوني

درب السنع وينه

ما شوف لي مرقى

من بير الأهوالي

من صد مظنوني

وخلى بلا دينه

يجاوب الورقا

من ضيجة البالي

عزاه يا عيوني

تبجي على عينه

بوشامة زرقا

بالحب قتالي

ياوي مزيوني

والطول وازينه

على كثر فرقا

والزلف ميالي

يلي تعذلوني

فرقا الضحى شينة

خد لمع برقا

يلحق على حالي

بالعيد عزوني

وين الطرب وينه

قلبي غدا سرقا

تم الحشا خالي
---
كلمات فهد بو رسلي
غناء عايشه المرطه

كدرتني يا نظر عيني

كدرتني يا نظر عيني
سالم من الشر وأسبابه

هذي عيون الشياطيني
تسطي عالحب واصحابه

ليت الذي فيك ياتيني
وانت شبابك تهنى به

ياسيد كل المزاييني
حبك برى القلب والبابه

ياكامل الزين والزيني
غيرك من البيض ماهابه

ولا انت رجاي ياعيني
والنفس من صوبك حبابه

كم جادل مولع فيني
لامر بيته ولا بابه

حبيت والله مشقيني
حسبي على الحب واسبابه

كدرتني يانظر عيني

سالم من الشر واسبابه

يا طير بالله خبرني - حورية سامي

يا طير بالله خبرني

عن اللي غاب من مده

عن الذي راح وسهرني
وحرمني شوفته ووده
يا طير يا طير
يا طير يا طير
انا أشذنبي يعذبني
يعذبني وانا اللي افرح بسعده
في هجره قلبي لوعني
وعذبني على بعده
يا طير يا طير
يا طير يا طير

كفى قلبي تسهرني

تسهرني واهو يرتاح في صده

خلاص انساه وريحني

ترى كل شي وصل حده

يا طير يا طير

صوت حورية في هذي الاغنيه لا يوصف,صوت ملائكي وانا الحقيقه عاجز عن وصفه,الكلمات لا شك انها من انسان مبدع لكن للأسف مااعرفه ,الجميل في الاغنيه انها غنيت بمصاحبة تخت عربي واظن ان اللحن سامري,,ماني متأكد

فن خماري - عايشه المرطه

عرفت عايشه المرطه بملكة السامري لكن هذا مايعني انها ما غنت الفنون الأخرى كالخماري والصوت , في هذا التسجيل نسمع فن خماري لقصيده اعتقد انها لفهد بو رسلي الله يرحمه, مليت من طرد الهوى , الصوت رخيم حزن , طبعا الخماري يختلف عن السامري وانا ماني من اللي ينطرب للخماري لكن هالتسجيل استثناء لانه بصوت المرطه , الكلام جميل والاداء رائع البحه المعروفه عن عايشه المرطه ظهرت عدة مرات بهالتسجيل...اتمنى انه يعجبكم